الرئيسية > اخبار السودان الان > خطة خالد بن الوليد.. – صحيفة الراكوبة

خطة خالد بن الوليد.. – صحيفة الراكوبة

جلس الرئيس ترامب أمامي مباشرة وجواره السفير الامريكي في الخرطوم.. وامام السفير طاسة كبيرة بها زيت يغلي وداخل الزيت المغلي سمكة كبيرة محروقة وداكنة اللون تعوم وسط الفقاقيع الملتهبة.. عن يميني يجلس صديق طفولة يعيش الان بالمهجر وعن يساري يجلس احد اقربائي ..
كنت اتحدث مع السفير الامريكي في كثير من القضايا بينما الرئيس ترامب يراقب الموقف عن كثب ويوافق على اقوالي بإيماءة راس خفيفة.. لاحظت صديق الطفولة يرمقني بنظرة انبهار وتعجب واستغراب.. بينما انا ادير دفة الحوار كأنني مذيع تلفزيون متمرس ومحترف..
فجأة قاطعنا الرئيس ترامب قائلا: كنت ساجعلهم مثل هذه السمكة  ان لم ينصاعوا لأوامري.. ربما حرقتهم حرقا..
قال السفير الامريكي وهو يخاطبني: هذه السمكة سأهديها لفريق الهلال..
الحقيقة التى يجب تقال ان معظم الحديث كان يدور بيني وبين السفير الامريكي بينما الرئيس ترامب وصديق الطفولة وقريبي يميلون جميعهم  للسكون والاصغاء..
في اليوم التالي بحثت في المدينة عن رجل يفسر الاحلام.. عادت بي الايام والسنوات الى الخلف.. الى مدينة ود مدني.. حيث حي المدنيين وحيث يقطن المرحوم سعيد الشايب احد زعامات الجمهوريين المشهورين.. استطيع القول بكل ثقة ان سعيد الشايب مفسر متمكن للاحلام.. فبيته المتواضع كان مأوي للمريدين والاحباب وطلاب العلم.. ولمن تزعجهم الاحلام ليلا مثلي انا..
بعد جهد جهيد وجدت مفسر احلام.. جلسنا سويا في (مقهى زرافة) الفتاة فارعة الطول.. بعد دقائق وضَعتْ امامي وامامه كوبين من شاي الكشري المخلوط بالقرنقل  هي عادة قديمة لم تفارقني منذ ايام مدينة بالزقازيق ومقاهيها المطلة علي محطة السكة حديد.. قال لي بصوت خافت وهو ينظر الى زرافة..
–       الزراف ركوب الجن..
حكيت لمفسر الاحلام حلمي كله جملة وتفصيلا.. بينما زرافة تتنصت على الحديث..
قال لي مفسر الاحلام: سوف يعتقلك رجالات الامن قريبا..
شَعَرَةْ جلدي انتفضتْ ثم قلت برهبة وخوف: ياستار .. انا علمت شنو؟
–       دا ما موضوعي.. انا مفسر احلام ليس الا.. اذا كان الموضوع عامل ليك ساخوتة في راسك ممكن تمشي تسالهم..
قلت بسخرية: عايزني امشي للعقارب في جحرها..
تذكرت المثل الذي يردده دوما صديقي الاسواني شيخ سيد خضيري (ال ينكش وسط العقارب يتلدغ)..
شربتُ كوب الشاي دفعة واحدة من جراء الرعب الذي اصابني ثم قلت له بعدما استوعبت الصدمة: وبعد ما يعتقلوني ال بيحصل شنو؟
اجاب هو يشرب شاي الكشري بامتعاض: موضوع اعتقالك ح يتصاعد لغاية ما يصل الى الرئيس ترامب..
–       الرئيس ترامب.. انت متاكد الرئيس ترامب شخصيا..
–         الرئيس ترامب ذاتو..
–       وبعدين..
صمت قليلا.. لاحظتُ احاسيس زرافة كلها متجهة نحونا ثم قال: يوجه الرئيس ترامب انذار للحكومة باطلاق سراحك في الحال.. الحكومة ح تخاف شديد ويطلقوا سراحك..
قاطعته: كيف الحكومة تخاف؟ والحكومة بتقول امريكا تحت جزمتي..
–       انس حكاية امريكا تحت جزمتي الكلام دا بيقولهو لينا هنا.. لكن مع الامريكا هم زي النعامة.. بعد داك ح تسافر الى امريكا ويستقبلك الرئيس ترامب والسفير في البيت الابيض انت وصديق الطفولة وقريبك..
–       دا كلام عجيب ..
–       ما عجيب الا الشيطان يا ابني..
–       والسمكة ال في الحلم تفسيرها شنو؟
–       السمكة المحروقة ال قال السفير ح يهديها لفريق الهلال بتعني انو فريق الهلال مهما جاتو دعومات مالية سخية ما ح يشيل كاس افريقيا ابدا ابدا.. الا اذا عادت السمكة المحروقة للحياة تاني..
تدخلت زرافة قائلا بحزن: ووب علينا.. يعني الهلال ما ح يشيل كاس افريقيا.. ووب علي.. ووب علي..
سحبني مفسر الاحلام بعيدا وجلسنا سويا تحت ظل نيمة عتيقة وقال لي: سيبك منها دي بت خرفانة ساكت.. دا تفسير حلمك..
–       طيب صديق الطفولة كان بينظر لي نظرة انبهار واندهاش ليه.. الحكاية دي تفسيرها شنو؟..
–       صديق طفولتك هنا ؟..
–       لا بلاد في المهجر..
–       عندك رقم تلفونه ؟..
–       ايوة ..
–       الاحاسيس ال بتختلج في النفوس.. دي ما عندها تفسير في الاحلام إلا بواسطة صاحبها.. دق ليهو تلفون واسالوا ليه كان مندهش ومنبهر هو ح يقول ليك كل شي.. بس قول ليهو يجهز البدلة من اسع عشان لقاء ترامب المرتقب قرًب.. البدلة لازم تكون رمادية لانو ترامب ذاتو رمادي.. زول متقلب المزاج لا بتعرفو اسود وللا ابيض..
صمت ثم طالبني بالبياض.. اعترضت بحجة ان شيخ سعيد الشايب لا يأخذ مقابل نقدي عن تفسير الاحلام لكن مجهودي ضاع سدا..
منحته خمس جنيهات رفضها وطالبني بكيس الرغيف الذي احمله امتنعتْ عن تلبية مراده لاني وقفتْ في الصف اكثر من ساعة كاملة.. لكنه اصر قائلا: انت ح تقابل رئيس امريكا شخصيا يعني ابواب القدر ح تتفتح امامك.. شهرة ومال وجنسية امريكية ..
امام قوة حجته وافقت واعطيته كيس الرغيف وقبل ان يبارح محله سالته : هل انت متاكد التفسير بتاعك دا صحيح مية المية..
اجابني: انا قريت مرة لي فاروق جبرة مقال.. كتب فيهو انو بيتعالج في مصر لان مستشفياتنا غير مطابقة للمواصفات والمقاييس.. لكن ابشرك التفسير بتاعي دا مطابق لمواصفات ومقاييس ابن سيرين شيخ تفسير الاحلام..
قبل ان ينصرف سالته عن وجود قريبي الذي كان في الحلم..
قال لي في قواعد اللغة العربية هناك كلمات وجمل لا مكان لها في الاعراب.. قريبك دا لا مكان له في تفسير الحلم.. دا زول طفيلي وفضولي حتى في الحلم ما داير يسيبك .. اتفكفك منو يا زول..
انصرف حاملا كيس العيش وقال لي : لما تقابل ترامب ما تبيع القضية قول ليهو تعال خلصنا لقد هرمنا لقد هرمنا.. قول ليهو بشة تعبنا شديد..
ايها السادة: تركني مفسر الاحلام اراجع التعديلات الوزارية الاخيرة.. (يشيلوا الوزير دا يودهو هناك ويجيبو الوزير داك لي هنا) وهكذا.. تذكرت احد الاردنيين كتب عن هذه التعديلات بانها مثل خطة خالد ابن الوليد في موقعة مؤتة.. المقدمة الى المؤخرة والمؤخرة الي المقدمة.. الميمنة الى الميسرة والميسرة الى الميمنة.. تبديل مواقع ليس الا..
الغريب في خطة خالد بن الوليد السودانية اصبح اربعة من اهل الرئيس يحتلون مناصب مرموقة.. مدير مكتب الرئيس ومفوض حقوق الانسان  والنائب العام ورئيس الوزراء..
رددت عبارة قراتها في صفحة الصحفي بشير اربجي وانا اطوى حكاية مفسر الاحلام وزرافة صاحبة المقهى:
(البشير في.. حل مافي)..

النذير زيدان

[email protected]


الراكوبة

شاهد أيضاً

كسلا.. يا (علماء السلطان) تحتاج الدواء وليس الدعاء!  – صحيفة الراكوبة

 بثينة تروس نعلم ان علماء السودان  يشرفهم ان يكونوا اْبواقا للحكومة. لقد صرحوا سابقاً  علي لسان  رئيس هيئة …

div class="clear">